شعر محكي مشاركة بسجال المجلة للشاعر سامي محفوض

شعر محكي لفارس المحكي الشاعر سامي محفوض
عند الصبح هَيلات جارتنا اعْتَدو
عا حَرَم بَلكوني وْلـَ أسْري مَهَّدو
طلَّيت حتى اسْتَكشِف الموضوع
يا دلّ دلِّي شو عيوني شاهَدو!!!

من كتر مانو حلو نَسَّاني الخطر
والـْ متلو ما عالبال من قبلو خطر
شو قيمتو كل الحلا إن كان
واجب عَلَينا نلتزِم «غض البصر»؟
شفت الـْ مَ فييي قول إلا مَجْمَلو
من وقتها تـَ فهمت شو يعني الحلو
شلال ليل وقمر عَ مْطَلّ النهود
وْمَشلَح هرِبْ من شَوب مَ بْيِتْحَمَّلو
لمَّا الحلو ربُّو بْتأنِّي جمَّلو
قصدُو العيون بـْ خلقتو يتأمَّلو
الله خلقلي عْيون إن شافو الجمال
بـِ يِتأمّلوا ولـْ هَيك خلقة يسَبحلو
رتاحو عيوني الشاهدو الزنار
هربان خايف من حريق النار؟
والروب متلو عَ الهرَب ناوي
وْطَيرَين صارو يْنَقورو لِزرار
عمَّرت بـِ خْيالي عَ كيفي مملكة/ي
فيها المحبة عَ المحبة تتِّكي
وهْجَرت أرض الواقع اللِّي مْسَوَّرا
بـْ ويلات من ويلات صارت تشتكي
مهما السنين بْيكبرو وبيعجّزو
وبيغربلوا وبينقّحو وِبْيفرزو
مَ بْيقْرَبو عَ الساكن بـْ قلبو حبيب
وْيمكِن عَ ذكرو، الخَتْيَرو، يِتْعكّزو
--------
الشعر للشاعر سامي محفوض